Dokument znajduje się w zbiorach Archiwum Głównego Akt Dawnych w Warszawie 

─────────────────────────────────────────────────────────────────────────────

 

                                                                                   

                                                                                      

 

 

 

Dyplom Jana Albrychta Radziwiłła  

dla geometry Mikołaja Hybenera z 1615 

 

29 V 1615, Kleck 

 

♦ 

 

Quamvis virtus suapte natura satis illustris sit externoque non egeat ornatu, illam tamen honor et 
commendatio comitari semper solent. Quare et nos Ioannes Albertus Radziwił Dei gratia dux in Ołyka 
et Nieświess Sacri Romani Imperii princeps etc. etc. habentes inter familiam nostram honestum ac 
integerrimum virum natione Prutenum Nicolaum Hybenerum nomine, quem tum mores ipsius 
integerrimi tum variarum regionum non solum Europaearum verum etiam Asiaticarum notitia, 
variarum denique linguarum peritia ita nobis commendarunt, ut his rebus adducti praesertim cum ante 
annos fere decem varias Europae nationes adire decrevissemus requisitum libenter eundem inter 
familiam nostram recepimus. Cuius dum versaretur apud nos in rebus arduis fidem, in providendis 
difficultatibus et periculis solertiam, in expediendis omnibus negotiis dexteritatem et diligentiam satis 
liquide perspeximus. Quare decrevimus ex nostra gratia singulari aliquo argumento eius erga nos tam 
devotum animum remunerari, sed cum ista ipsius erga nos offitia auro vel argento compensari vix 
possint, adducti exemplis aliorum principum, qui famulis de se bene meritis idem praestare soleant 
beneficium, quare et nos ea potestate, quae maioribus nostris et nobismet ipsis a Sacrae Sedis 
Imperialis Magestate concessa est, praedicto Nicolao Hybenero eiusque posteris ius arma ubique 
gestandi concessimus et hisce praesentibus concedimus. Et quo gratia nostra in eum collata lucidior 
existat, abrogato antiquo signo et sigillo illius, quo hactenus utebatur, habentes cognominis illius 
rationem Hybener enim nihil aliud in lingua Germanica sonat, quasi dicas dimensor agrorum damus et 
concedimus illi ipsi et posteris eius novum stemma, tale videlicet: in scuto depictus erit vir agro 
insistens dextraque vomerem tenens supra cuius caput luna dimidiata cum stella in campo caelestino 
appingetur idque ratione periculorum, quae idem ille in regionibus Turcico imperio cum ad mores 
hominum videndos et linguam Turcicam ediscendam plerasque peragrasset, subivit supra scutum vero 
galea in cuius summitate idem vir cingulocenus appictus stabit luna cum stella capiti eius superstante, 
uti ex hac pictura clarius perspici potest. Hoc igitur stemmate illum ipsum et posteros eius in 
perpetuum ornamus eoque uti concedimus ac permittimus. Cui donationi ac ordinationi nostrae 
neminem contradicere ac refragare posse pro certo habemus. In cuius rei maiorem fidem hasce literas 
manu nostra subscriptas sigillo nostro appresso muniri iussimus. Datum in arce nostra Clecensi, anno a 
reparata salute M. DC XV. IIII calendas Iunii.  
Ioannes Albertus Radziwił manu propria.